06/11/2013 14:23:19

Supa Borsh

nga Brunhilda Çela

Sekretet e aromave të Brunhildës Këtu po ndaj një album të vjetër timin. Këtë recetë e keni edhe tek libri im i kuzhinës. Supa borsh sipas variantit tim.

Për lëngun e mishit na duhet 600 gr mish tul lope, një kockë lope, 1.5 l - 2 ujë, 1 lugë gjellë vegetë natyrale (unë nuk përdor vegeten me glutamat natriumi dhe ngjyruës. Për ata që nuk e njohin vegeten ështe një përzierje erëzash të thatë e të bluara të përziera me kripë).

Karotë, selino, qepë, majdanoz, kripë. I jep një shije të veçantë supave. Mund të prodhohet dhe vetë në shtëpi duke i tharë këto përbërës dhe pastaj i bluan të përzier me kripën.

2 gjethe dafine
4-5 kokrra piperi,
1 qepë me gjithe lëkurë
kripë 1 lugë kafeje
pak rrënjë selinoje
rrënjë majdanozi 1-2 copë
kërcella majdanozi dhe gjethe majdanozi 4-5 copë
2-3 karota
1 gjysëm preshi

Këto të gjitha i vëmë në tenxhere të ziejnë me ngadalë duke ua hequr shkumën që krijohet në fillim. Zierja zgjat rreth 2 orë por nëse doni më shpejt mjaftojnë 20-25 minuta në tenxhere me presion.

Mishin tul e heqim mënjanë dhe kullojmë lëngun në një sitë. Zarzavatet e stërziera i hedhim esenca dhe shija e tyre është tashmë në lëng. Lëngu është baza e supës.

Për supën borsh na duhen dhe këto përbërës të tjerë
2-3 karota
1 gjysëm preshi
2 patate
1 dorë lakër të bardhë
2 rrepa të kuq të zier më parë
pak selino
1-3 rrënjë majdanozi
1 qepë të vogël
3-4 thelba hudhre
30 ml vaj
1 lugë gjelle miell

Pak kripë nëse nevojitet. 1 filxhan çaji pure domatesh (unë përdora konservë të gatshme), 1 tufë majdanoz. Sipas dëshirës krem fraiche (njëlloj kremi pana i thartuar apo pavllak si i thonë në Kosovë). Në mungesë të tij salcë kosi, ky i vihet vetëm në fund supës nëse e dëshironi jo se duhet patjetër.

Përgatitja: Në fillim të gjitha zarzavatet do i grini ca në kubikë të vegjël ca në më të mëdhenj, lakrën gjithashtu në fije po jo të hollë shumë.

Në një tenxhere hedhim vajin e ullirit dhe kavërdisim lehtë qepën e grirë hollë dhe selinonë e prerë në kubikë të vegjël sa të lëshojnë pak aromë.
Pastaj shtojmë miellin dhe e shuajmë me lëngun e mishit.

Shtojmë aty patatet, karotat, preshin dhe purenë e domates dhe i lëmë te marrin ca valë rreth 10-13 minuta sa të zihen por jo të bëhen dru. Pastaj shtojmë lakrën e grirë, mishin e grirë në kubikë dhe i lvmë të marrin ca valë, dhe në fund farë shtojmë rrepën e kuqe të zier e të prerë gjithashtu.

Mjafton 2-3 valë dhe e heqim nga zjarri. Shtojmë në fund dhe majdanozin e grire hollë. E servirim në pjatë me 1 lugë ajkë të thartë dhe me një copë bukë të freskët mundësisht. Unë atë ditë kisha bërë ca bukë që janë këtu traditë e quhen Laugenstangerl me fara lulediellli e fara kungulli sipër. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin