21/09/2013 11:53:21

Festivali i të drejtave të njeriut në Marubi

Nga rreth 350 filma të ardhur nga mbarë bota, publikut shqiptar do t’i paraqiten 43 filma të metrazhit të plotë, dokumentarë e filma me metrazh të shkurtër

TIRANË - Festivali Ndërkombëtar i Filmit për të Drejtat e Njeriut në Akademinë e Filmit dhe Multimedias Marubi rikthehet në edicionin e tij të tetë, që do të zhvillojhet në 23-29 shtator. Nga rreth 350 filma të ardhur nga mbarë bota, publikut shqiptar do t’i paraqiten 43 filma të metrazhit të plotë, dokumentarë e filma me metrazh të shkurtër. Rreth 18 autorë të ardhur nga vende të ndyshme do të prezantojnë veprat e tyre dhe do të zhvillojnë debate me spektatorët rreth tematikave që filmat e tyre trajtojnë.

Sipas drejtori të festivalit, Kujtim Çashku, temë qëndrore e këtij edicioni është dhuna në familje. “Por njëherësh gjatë ditëve te festivalit spektatorë do të shohin filma me tematika të mprehta shoqërore si krimi i organizuar, korrupsioni, kapja e shtetit, skllavëria moderne si një formë e re shfrytëzimi, revolucionet virtuale dhe pushtetit mediatik, çmemorizimi kulturor dhe efemerizmi i përditësuar, bombardimi i butë i trurit dhe mbajtja e tij nën kontroll, etj”, është shprehur Çashku, gjatë një konference për shtyp.

Filmi që do të hapë këtë edicion është filmi Britaniko-Indian “Salma”, i regjisorit Kim Longinoto fitues i “Sundance Film Festival”. Ky film do të prezantohet nga vetë protagonistja e ardhur nga India, aktivistja legjendare, politikania dhe poetesha tashmë e njohur në të gjithë botën me emrin Salma.

President Nderi i IHRFFA-s Theodor Orlin i Utica College, New York, është shprehur se le t’i konsiderojmë tematikat e këtij festivali si mënyra që ne mund të kërkojmë politika, praktika e modalitete në fushën e mbrojtjes së të drejatve të njeriut, në mënyrë që brezat e ardhshëm mund të gëzojnë jetën në respektim më të thellë të të drejtave universale të njeriut. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin