31/08/2013 13:24:01

Peshk barbun me domate

nga Brunhilda Çela

Sekretet e aromave të Brunhildës Kjo ishte dreka ime sot e lehtë dhe shumë e shijshme. Për këtë recetë peshku barbun të zier në furrë me domate, erëza e shumë majdanoz unë kisha:
1 kg peshk barbun
1 qepë mesatare
5-6 thelba hudhër
2 speca jo shumë djegës
1 spec të kuq djegës

Për këtë recetë duhen dhe dy kërcej selinoje e ngrirë hollë por unë nuk pata kësaj radhe dhe e lashë
Kripë, piper, ca kokrra piperi
1 gotë verë e bardhë rreth 150 ml
1 kg domate të pjekura shumë dhe të ëmbla (unë përdora domate shamsha)
1 tufë majdanoz të freskët
1 lugë gjelle pekmez kumbulle jeshile (po nuk e patët e lini)
1 lugë çaji rigon

Përgatitja: Në një tigan hedhim ku kemi vënë vajin e ullirit të ngrohet, shtojmë hudhrat të grira me thikë jo aq hollë sa të zverdhen pak e të aromatizojnë vajin por jo të digjen.

Shtojmë qepen e grirë imët, specat, e vazhdojmë dhe ca kaverdisjen, shtojmë pekmezin dhe domatet: i lëmë të ziejnë rreth 10 minuta sa të fillojnë të trashen pak, shtojmë aty kripën, piperin, kokrrat e piperit, rigonin, majdanozin e grirë por jo të gjithë, lëmë ca majdanoz për në fund.

Shtojmë dhe barbunin aty duke e radhitur me kujdes, shtojmë verën e bardhë dhe e lëmë të marre ca valë, pastaj e transferojmë në tavën e baltës ose i ziejmë mbi sobë duke e mbuluar me kapak.

E vëmë në zjarr të ulët derisa të trashet lëngu dhe peshqit të jenë zier në lëngun e domates. Unë i bëra në tavën e baltës duke i pjekur rreth 25 minuta me kapak mbuluar që mos të thahen e të dalin në lëng, me temperaturë 185 gradë. Në fund kur e servira i shtova dhe majdanozin e freskët dhe rigon.

Kjo nuk është tamam tavë peshku si tavat që bëhen më shumë qepë, dafinë e erëza, por kjo lloj tave ka domaten si përbërësin kryesor dhe bëhet me shumë pak qepë ose pa qepe fare.

Mund t'a skuqni pak lehtë peshkun më parë duke e lyer me miell por unë preferoja ta bëj kështu më duket sikur dhe lëngu dhe peshku në këtë mënyrë merr më shumë shije. Mund t'i shtoni dhe ca kokrra kaperi nga fundi ose ca ullinj. Na ndiqni dhe në Facebook

HermesNews - ©2013

Dërgo me email | Stampo artikullin