07/08/2013 18:25:52

Nderron jete aktori Llambi Burgjia

Burgjia renditet mes aktorëve të njohur elbasanas si Demir Hyskja, Ferit Gjevori, Hysen Biza, Agron Treceni e Shane Shllaku

ELBASAN - Ndërroi jetë në moshën 75 vjeçare aktori dhe regjizori i njohur elbasanas Llambi Burgjia. Lajmi i vdekjes së tij nga një sëmundje e pashërueshme u mësua mengjesin e sotëm, ndërsa kanë qenë edhe të menjëherëshme reagimit e qytetarëve të thjeshtë, por edhe të intelektualëve për këtë figurë të njohur të Elbasanit, që në vitet 1955 e në vijim, që me krijimin e estradës së qytetit.

Burgjia renditet mes aktorëve të njohur elbasanas si Demir Hyskja, Ferit Gjevori, Hysen Biza, Agron Treceni e Shane Shllaku, etj, të cilët së bashku arritën të vinin në skenë shumë premiera.

Ai jetonte me bashkëshorten e tij në një banesë në qendër të qytetit. Baba i dy fëmijëve, ai tashmë ishte dhe një gjysh i lumtur. Mesditën e së mërkurës janë zhvilluar edhe homazhe nderimi për këtë figurë të qytetit të Elbasanit, që çdo ditë e gjeje të ulur në hollin e teatrit "Skampa", duke kujtuar vitet, kur me humorin e tij kënaqte spektatorin elbasanas.

Kreu i Bashkisë Qazim Sejdini shprehu ngushëllimet më të thella për ndarjen nga jeta të aktorit Burgjia. "Humbja e tij do të jetë e pazëvendësueshme jo vetëm për familjarët, por edhe për kolegët, bashkëpunëtorët dhe të gjithë miqtë që e patën njohur. Si aktor, Llambi i dha vlera estradës me rolet e tij, si dhe teatrit të kukllave. Elbasanit do t`i mungojë një qytetar dhe aktor i nderuar si Llambi", tha Sejdini.

Të njëjtin mendim, si edhe shumë ngushëllime, përcjellin edhe miqtë e tij, miq të skenës dhe të njohur ndër vitet e jetës së tij. Burgjia ka vënë në skenë më shumë se 300 role komike në skenën e teatrit "Skampa". Ai ka qenë regjizori i më shumë se 20 veprave letrare të vëna në skenë prej tij dhe interpretuar nga trupa e estradës së Teatrit "Skampa".

HermesNews - ©2013

Dërgo me email | Stampo artikullin