07/08/2013 11:19:11

''Romeo & Zhuljeta'': po romët ?

Artëdashës sjellin elementë nga jeta e komuniteteve me ngjyrë në Durrës, paralele e ngjashme me atë që u pa në ekran

DURRËS - Shfaqja e dokumentarit artistik “Romeo e Zhulieta”, në galerinë e arteve Jozef, të Durrësit, u bë shkas për një debat, lidhur me kushtet e jetesës dhe integrimin e romëve në jetën shqiptare.

Vepra e Stefan Çapalikut, e cila kalon kufijtë e një dokumentari të zakonshëm, brenda 30 minutash kërkon të sjellë një realitet pak të njohur, duke kërkuar edhe motive artistike në tregimin e tij.

I njohur si dramaturg i impenjuar në problematikat shqiptare të tranzicionit, Çapaliku edhe këtë herë ka projektuar në ekran një dramë të shkruar dhe të vënë në skenë prej tij, me aktorë të pazakontë.

Në teatrin e mirënjohur “Migjeni”, të Shkodrës, janë ngjitur artistët e rrugës, përfaqësues të komuniteteve rom dhe magjyp të qytetit verior, realitetin e të cilit Çapaliku e njeh si artist e si shkodran.

Dy grupet, me urën e Bunës dhe me problematikat e bashkëjetesës jo vetëm mes tyre, por edhe me ato të integrimit me pjesën tjetër të qytetit dhe me jetën sociale-ekonomike të vendit në përgjithësi, janë bërë frymëzimi i trishtuar i autorit të dramës, e cila është kthyer në një dokumentar.

Kamera e shkathët e Florian Haxhihysenit, në shumicën e rasteve ka shmangur tekstin e tepërt, duke nënvizuar një realitet jetese të vështirë.

Përgatitjet e grupit artistik, që do të luajë në skenën e “Migjenit”, tragjedinë “Romeo e Zhulieta” të Shekspirit, sipas versionit të Çapalikut, janë në objektivin e kameras nën qiellin gati për rrebesh të Shkodrës, ndërsa salla e shfaqjes mbushet me spektatorë që kanë ardhur të shohin veten dhe hallet e tyre.

Diskutimi i organizuar pas shfaqjes së filmit-dokumentar në Durrës, sipas autorëve, i shërben njohjes më mirë të problematikës, e cila që prej 10 vjetësh mbështetet edhe nga Strategjia kombëtare për integrimin e komunitetit rom, trajtimi i të cilëve është edhe kërkesë e BE në familjen e së cilës kërkojmë të jemi.

Të pranishmit sollën elementë nga jeta e komuniteteve me ngjyrë në Durrës, një paralele e ngjashme me atë që u pa në ekranin, ku u projektua “Romeo e Zhulieta” e Stefan Çapalikut.

Dokumentari i realizuar me mbështetjen e Qendrës Zeta dhe Fondacionit Soros, pas Shkodrës, Tiranës e Durrësit, do të shfaqet këto ditë edhe në Elbasan, Korçë, Fier dhe Vlorë.

HermesNews - ©2013

Dërgo me email | Stampo artikullin