30/07/2013 19:14:44

Bienalja e muzikës në Durrës

Gjatë ditëve të bienales do të zhvillohet edhe Koncerti Didaktik me titull “Muzika dhe Matematika” si dhe do të mbahet Nata e Yjeve te Rinj, një konkurs i talenteve të rinj, që do të zgjedhë solistin më të mirë, i cili do të ftohet për disa koncerte në Spanjë

TIRANË -Nga data 1 deri në datën 8 gusht, në qytetin bregdetar të Durrësit, ku gjatë verës pushojnë me mijëra pushues vendas e të huaj, do të mbahet edicioni i 6-të i bienales së muzikës klasike “Netët e muzikës klasike”. Bienalja e sivjetshme e muzikës klasike zhvillohet nën moton: “Durrës: 700 vjet muzikë – nga Kukuzeli në ditët tona”.

Për këtë arsye Nata e Muzikës së Vjetër i është dedikuar sivjet muzikantit të lashtë durrsak Jan Kukuzelit (sh.XIII), Nata e Muzikës Mesjetare Antifonarit durrsakut Gjergj Danush Lapacaj (sh. XV); Nata e Muzikes Barrok do i kushtohet arshivit të Familjes Durazzo (sh. XVIII); Nata e Muzikes Shqiptare do të trajtojë temën mbi artin e violinës në Shqipëri dhe të shkollës violinistike durrsake.

Vepra e porositur enkas për çdo edicion, këtë vit do të jetë krejt e veçantë . 10 kompozitorë nga Durrësi kanë shkruar secili nga një variacion mbi një korale të Kukuzelit. Thuajse të gjitha veprat do të jenë premiera.

Në këtë aktivitet do të marrin pjesë solistë edhe instrumentistë durrsakë të suksesshëm jashtë vendit. Në bienale merr pjesë edhe Grupi Instrumental Siglo XX, një nga grupet më të njohura të muzikës moderne i drejtuar nga një instrumentist nga Durrësi. Ky grup do të luajë gjatë Natës së Muzikës Moderne “Kuartetin e Fundit të Kohërave” të Messiaen, një nga kryeveprat e padiskutueshme të muzikës së shekullit XX.

.

HermesNews - ©2013

Dërgo me email | Stampo artikullin