15/07/2013 08:00:42

Marmaladë kajsie

nga Brunhilda Çela

Sekretet e aromave të Brunhildës Në fillim i përvëlojmë kajsitë dhe ua heqim lekurën, i qëroj nga bërthamat, i presim në copa të vogla dhe në një kg fruta të qëruara gati shtoj 500 gr sheqer, plus një gotë të vogël rakie liker kajsie (ose rum) ose raki kajsie jo vetëm i jep shije por dhe është konservues i mirë. Kuptohet që nuk duhet ta bëni kështu si unë me akohol për fëmijet e vegjël.

E ziej shumë pak që mos të shkatërrohet aroma dhe ngjyra dhe në fund fare i shtoj një lugë kafeje plot agar-agar (është një pluhur i bardhë që përfitohet nga algat e detit që ndihmon për të lidhur salcërat e ndryshme apo për marmaladat. Nuk ndikon në shije apo ngjyrë pasi pluhuri është neutral).

Marmalada ka tepër shije është aromatike dhe lidhet bukur, bëhet një zhel i lidhur mirë pa përdorur shumë sheqer. Kështu ndihet aroma e frutit më mirë dhe nuk është tepër e ëmbël.

Mund të përdorni dhe sheqer që është posaçërisht për marmaladat, sheqer me pektinë brenda dhe ky ndihmon që mos të përdorim shumë sheqer dhe të përfitojmë një marmaladë sa më natyrore (ku ndihet aroma dhe shija e frutit shumë mirë).

Marmaladën e nxehtë e mbushim në vazo të pastra të sterilizuara më parë (pra i zieni në ujë të valuar disa minuta me gjithë kapakët) dhe kështu ajo rron me vite. Unë nuk bëj shumë se çdo vit bëj të re. Ju bëftë mirë !

HermesNews - ©2013

Dërgo me email | Stampo artikullin