08/07/2013 18:33:03

Haxhi Muça uron muajin e Ramazanit

Nesër nis Muaji i Ramazanit

TIRANË - Kryetari i Komunitetit Musliman Shqiptar, Haxhi Selim Muça, ka uruar sot besimtarët për muajin më të rëndësishëm të Islamit. "Ramazani, është një kohë kur besimtarët së bashku me agjërimin që i jep kuptimin esencial këtij muaji, rinovojnë devotshmërinë ndaj Zotit, rizgjojnë edhe një herë fuqishëm mëshirën, dashurinë dhe përkrahjen ndaj njerëzve. Ramazani është një kohë e bekuar, ku besimtarët reflektojnë edhe një herë mbi mendimet dhe sjelljet e tyre, duke e kthyer dëgjimin më shumë se kurrë tek zëri i ndërgjegjes dhe melodia e zemrës". Haxhi Selim Muça, i fton të gjithë besimtarët në lutje, "Shoqëria jonë sot ka nevojë për drejtësi". Sipas kalendarit të komunitetit Musliman Shqiptar, ora 03:06 shënon syfyrin e parë të muajit më festiv për çdo musliman. Çdo besimtarë musliman, sipas fesë islame, është i detyruar të agjërojë për 30 ditë me radhë, në shenjë solidariteti me të varfërit si dhe të ndajë ushqimin gjatë këtij muaji me nevojtarët. Pas 30 ditëve agjërim, muslimanët festojnë Bajramin e Madh. Fillimi i Muajit të Ramazanit, përcaktohet sipas kalendarit hënor.

HermesNews - ©2013

Dërgo me email | Stampo artikullin