22/06/2013 16:40:33

Drejt Vjenës me bursa studimi

Përveç udhëtimit në Vjenë për 8 sportistët dhe artistët më të mirë, Bashkia e Tiranës do t’u akordojë edhe nga një bursë studimi për degën që ata preferojnë

TIRANË - Një udhëtim në kryeqytetin austriak Vjenë, është shpërblimi që Kryebashkiaku i Tiranës Lulzim Basha, u ka bërë 100 nxënësve të shkollës së mesme Ismail Qemali, e cila u shpall shkolla më e mirë në konkursin Tirana-Teens. Këtij grupi do t’i bashkohen edhe nxënësit që u shpallën më të mirët në sport dhe art. "Sikundër ju premtova, sot do të japim çmimin surprizë për shkollën fituese, që është “Ismail Qemali” dhe këta 8 sportistë dhe artistë të gjimnazeve të tjera, të cilët do të udhëtojnë bashkë me ju, si fitues të këtij çmimi surprizë. Konkretisht, shpërblimi për 100 fituesit e konkursit "Tirana Tens"- Art & Sport, është një udhëtim Tiranë-Zagreb-Vjenë", u shpreh Basha gjatë takimit më nxënësit fitues. Përveç udhëtimit në Vjenë për 8 sportistët dhe artistët më të mirë, Bashkia e Tiranës do t’u akordojë edhe nga një bursë studimi për degën që ata preferojnë. "Kemi 3 bursa për 8 më të mirët. Arsyeja se pse kemi 3 është pasi 5 prej tyre nuk janë maturantë por edhe për ata të pestë, pas përfundimit të Maturës, sipas marrëveshjes para konkursit, Bashkia e Tiranës do të japë bursën për studimet në Universitet", u shpreh Basha. Në këtë aktivitet morën pjesë 24 shkolla të mesme publike dhe private të kryeqytetit.

HermesNews - ©2013

Dërgo me email | Stampo artikullin