07/06/2013 09:34:21

Riccardo Cocciante dekorohet në Shqipëri: pritje në Presidencë

Fituesja e Voice of Italy dhe kantautori Riccardo Cocciante mbërrijnë në Tiranë

(16:32) - Kantautori italian Riccardo Cocciante ka mbërritur në Tiranë paraditen e sotme. I rrethuar nga gazetarë në aeroportin “Nënë Tereza”, Cocciante deklaroi se ndihet i lumtur që ka bashkëpunuar për të bërë diçka për artin mes dy vendeve.

“Që në fillim kam menduar që arti s’duhet të njohë kufij, por kjo u konfirmua edhe njëherë tjetër pikërisht në këtë spektakël, pasi italianët janë treguar të hapur duke vlerësuar me çmim një këngëtare të talentuar, por që nuk është italiane”, tha Cocciante.

Sipas tij, Elhaida këndonte shumë mirë, por të jesh këngëtar duhet të kesh edhe një teknikë të mirë, pra të përdorësh mirë zërin. “Nuk dija që isha kaq i famshëm këtu. Dija diçka, por jo shumë. Për këngën “Margherita” s’e dija që ishte kaq e fortë si mit, më bëhet shumë qejfi kuptohet, pasi e kam kompozuar e kam kënduar, dhe është bukur të mësosh që një popull është kaq pranë këtij lloj arti”, tha Cocciante.

Kjo është hera e parë që kantautori vjen në Shqipëri. Gjatë vizitës së tij, ai do të takohet me Kryeministrin Berisha, ministrin e MTKRS-së, Visar Zhiti si dhe do të dekorohet nga Presidenti Bujar Nishani.


TIRANË - Elhaida Dani dhe kantautori italian Riccardo Cocciante, trajneri që i dha një mbështetje të fuqishme këngëtares fituese në "Voice of Italy", mbërrijnë sot në Tiranë. Me ftesë të Ministrit të Turizmit, Kulturës, Rinisë dhe Sporteve, Visar Zhiti, dhe nën kujdesin e Kryeministrit Sali Berisha, kjo vizitë organizohet në vlerësim dhe falenderim të kantautorit, i cili e udhëhoqi dhe e ndoqi me përkushtim dhe ndjeshmëri të pazakontë performancën në rritje të Elhaida Danit. Cocciante dhe Elhaida mbërrijnë në Tiranë sot në mesditë dhe do të priten nga autoritetet e Ministrisë së Turizmit, Kulturës Rinisë dhe Sporteve. Të shtunës, në mjediset e Presidencës kantautori Cocciante do të dekorohet nga Presidenti Nishani, e më pas do të takohet edhe me Kryeministrin.

HermesNews - ©2013

Dërgo me email | Stampo artikullin