27/05/2013 16:11:31

'14 vjeç dhëndërr' shfaqet për bamirësi

Shërimi i Mejsit mundësohet vetëm nga operimi në një spital të specializuar në Gjermani, i cili kushton 40 000 euro, shifër e papërballueshme nga familja e saj

TIRANË - Teatri i Metropolit shfaq më 28 Maj, te amfiteatri, pranë Liqenit Artificial të Tiranës, komedinë "14 vjeç dhëndër". Kjo shfaqje jepet për bamirësi për Mejsin, një dy vjeçare me tumor në kokë.

Historia e vogëlushes ka sensibilizuar mbarë opinion publik. Vajza nga Fieri, vuan nga një sëmundje e rëndë. E prekur nga një tumor i rrallë ajo rrezikon shikimin e më pas jetën. Shërimi i Mejsit mundësohet vetëm nga operimi në një spital të specializuar në Gjermani, i cili kushton 40 000 euro, shifër e papërballueshme nga familja e saj.

Jo vetëm në qyetin e Fierit, nga ku nisi “Ndihmoni Mejsin”, por në mbarë Shqipërinë, janë zhvilluar organizime sensibilizuese për grumbullimin e parave që të mundësojnë operimin dhe shërimin e Mejsit.

Komedia "14 vjeç dhëndër", bazuar mbi motivet e Çajupit, vjen me regji të Elma Doresit. Vepra me anë të një varg situatash e skenash komike dhe batutash plot humor ironizon mendësi të mykura, patriarkale e zakone të prapambetura.

Dritëshkurtësia e një nëne, që është bartëse dhe viktimë e patriarkalizmit, dembelizmi i burrave të malësisë dhe kapadaillëku i tyre, grindjet e kota dhe thashethemet e një mjedisi të prapambetur, figura groteske e një prifti qejfli, të gjitha vihen në lojë me një ton hokatar që përshkron dialogun e personazheve.

Interpetojnë aktorët, Klodiana Keço, Klodian Hoxha, Devis Muka, Elona Hyseni, Lorenc Kaja, Ermela Ruri, Genti Deçka, Alban Musa, Doriana Caushi, Aldion Matarangasi, Klaus Laçi.

HermesNews - ©2013

Dërgo me email | Stampo artikullin