23/05/2013 22:32:55

Kledi Kadiu në festivalin ndërkombetar të baletit në San Remo

Në teatrin e famshëm Ariston në San Remo do të mbahet edicioni i dymbëdhjetë i “Cmimit ndërkombetar të baletit” për moshat e reja

SAN REMO - Të premten dhe të shtunën e ardhshme në teatrin e famshëm Ariston në San Remo do të mbahet edicioni i dymbëdhjetë i “Cmimit ndërkombetar t ëbaletit” për moshat e reja. Takimi organizohet nga Ariston Proballet në bashkëpunim me Komunën dhe përbën një nga manifestimet ndërkombëtare të sektorit nga më të mëdhajat që organizohen në Itali.

Eshtë një vitrinë e cmuar për talentet e reja në balet që ëndërrojnë të ndjekin hapat e Nureyev, Stefanescu, etj. Do të jenë të pranishëm edhe shumë emra të njohur të baletit botëror, të cilët dëshmojnë vlerën e kësaj shfaqeje: si drejtori i trupit të baletit të Stuttgart-it Taddeush Mattaci, Presidenti botëror i federatës së baletit dhe konkurseve Sergey Usanov dhe Kledi Kadiu, balerini i mirënjohur shqiptar i cili që nga viti 2008 ka marrë nënshtetësinë italiane.

Kledi Kadiu lindi në 1974 në Tiranë dhe u diplomua në Akademinë kombëtare të baletit dhe gjithashtu ka qenë pjesë e trupës së baletit në Tiranë. Hyri në Itali si klandestin me një nga anijet e 1993-shit, dhe që atëherë ka punuar me angazhim dhe këmbëngulje që të ndërtonte një të ardhme në fushën e baletit, për të cilën kishte studjuar në atdhe.
Menjëherë u bë i famshëm për publikun italian falë pjesëmarrjes në emisionin “Amici” të Maria De Filippi-t, madje arriti të ngjitej edhe në skenat e teatrit prestigjoz Teatro alla Scala në Milano.

Festivali ndërkombëtar i baletit në San Remo do të artikullohet në faza eliminuese dhe finale. Të rinjtë pjesëmarrës do të nëngrupohen në tre kategori të ndryshme: Balet klasik, modern dhe grupe. Secila nga dy kategoritë e para përbëhet gjithastu nga nënkategoritë Baby, Juniores, Seniores. Në fashën Baby marrin pjesë të rinjtë nga 8 në 11 vjec, në Juniores nga 12 në 16 vjec,ndërsa të tjerët përfshihen në Seniores.
Garuesit do të mund të paraqiten individualisht ose në grupe. Gjithashtu ata që paraqiten si individual në garë do të mund të shoqerohen nga një moshatar jo garues. Pas eliminimeve do të vijojë finalja dhe në fund ndarja e cmimeve .

Fituesve do u sigurohen bursa studimi në New York dhe mundësia për të marrë pjesë në baletin e famshëm “Arrethyesi” i Tchaikovsy-t në skenat e Albano Connecticut ballet, një nga trupat më të mëdha të baletit amerikan.

Daniela Vathi

Dërgo me email | Stampo artikullin