22/05/2013 18:05:07

Torino, Shqipëria në panairin e librit

Panairi Ndërkombëtar i Librit në Torino është më i madhi në Itali dhe një prej më të rëndësishmëve në Europë dhe në rajonin e Mesdheut

TORINO - Shqipëria, letërsia dhe kultura e saj u paraqitën këto ditë në Panairin Ndërkombëtar të Librit, që u zhvillua në Torino të Italisë. Vendi ynë mori pjesë për herë të parë në këtë ngjarje të rëndësishme kulturore, me një stendë të tijën ku u paraqitën veprat e autorëve më të njohur shqiptarë të botuar në gjuhën italjane, si edhe një përzgjedhje titujsh në gjuhën shqipe. Pjesëmarrja e Shqipërisë u mundësua nga Qendra e Kulturës Shqiptare (www.culturaalbanese.it), me patronazhin e Ambasadës së Shqipërisë në Itali.

Panairi Ndërkombëtar i Librit në Torino është më i madhi në Itali dhe një prej më të rëndësishmëve në Europë dhe në rajonin e Mesdheut. Në të marrin pjesë mbi 1200 ekspozues, si edhe rreth 3000 mijë gazetarë nga e gjithë bota, që ndjekin takimet e shumta që zhvillohen gjatë ditëve të panairit me autorët më të njohur italjanë dhe ndërkombëtarë. Panairi shënoi këtë vit edhe një numër rekord vizitorësh, mbi 340 mijë!

Stenda shqiptare, e çelur për herë të parë në historinë e panairit të Torinos, u prit me mjaft interes nga publiku. Lexuesit torinezë patën mundësinë të njiheshin aty nga afër me veprat e Kadaresë, Kongolit, Aliçkës, Cekës, Zhitit, Kyçykut, Çulit, Mustafajt, etj., të përkthyera në italisht, si edhe ato të shkrimtarëve shqiptarë që shkruajnë dhe botohen drejtëpërdrejtë në gjuhën italjane, ndër të cilët Ibrahimi, Dones, Vorpsi, Kubati, etj. Nuk mungonin titujt e zgjedhur në gjuhën shqipe, si edhe një seksion i posaçëm kushtuar letërsisë dhe studimeve arbëreshe.

Vizitorët e njohur

Prania e Shqipërisë tërhoqi gjithashtu vëmendjen e shumë personaliteteve të artit dhe të politikës së vendit fqinj. Kështu, hapësira shqiptare u vizitua nga tre përfaqësues të lartë të qeverisë italjane, ministri i turizmit dhe kulturës Massimo Bray, ministri i marrdhënieve parlamentare Dario Franceschini dhe ministrja e integrimit dhe bashkëpunimi ndërkombëtar Cécile Kyenge.

Përfaqësuesit e lartë të institucioneve të shtetit fqinj shprehën vlerësimin e tyre për ecurinë e proçeseve integruese të Shqipërisë në bashkësinë europjane dhe u interesuan për aspekte të posaçme të kulturës dhe trashëgimisë së vendit tonë, pa harruar realitetin e bashkësisë së madhe shqiptare që jeton dhe punon në Itali. Ministrat italjanë u shprehën njëzëri të bindur se marrdhëniet mjaft të mira mes dy vendeve tona do të rriten dhe fuqizohen edhe më tej në të ardhmen. “Gëzohem ta shikoj Shqipërinë në Panair,” - u shpreh, në shënimin e tij në librin e përshtypjeve të stendës shqiptare, ministri Franceschini, “deti në mes na bashkon, nuk na ndan!”

Stenda shqiptare u vizitua gjithashtu edhe nga kritiku i njohur i artit Vittorio Sgarbi. Ai e vizitoi pavjonin shqiptar, ashtu si edhe ministri Bray, në mbyllje të ceremonisë së inaugurimit, ku mori pjesë ambasadori shqiptar në Itali prof. Neritan Ceka. Sgarbi dhe ministri Bray u ndalën gjatë në stendën shqiptare, ku u shoqëruan nga ambasadori Ceka, i cili i ilustroi miqve italjanë përmbajtjen e saj dhe aspekte të letërsisë dhe trashëgimisë shqiptare. Në ceremoni morën pjesë gjithashtu konsulli i Shqipërisë në Torino, z. Artan Doda, drejtori i Zyrës së Dhomës së Tregtisë së Tiranës në Torino, arkitekti Giovanni Lauria dhe prof. Vincenzo Cucci i bashkësisë arbëreshe.

Me ftesë të drejtorit të Qendrës së Kulturës Shqiptare, gazetarit Benko Gjata, stendën e vizitoi edhe një personalitet i shquar i letërsisë botërore, shkrimtari amerikano-latin Luis Sepulveda. Autor i një numri të madh best-sellerësh, ndër të cilët romanet “Ditari i një vrasësi sentimental”, “Plaku që lexonte romane dashurie”, “Një emër toreadori”, etj., Sepulveda është jo vetëm një prej autorëve më të lexuar e më të vlerësuar bashkëkohorë, por edhe një emblemë e lëvizjes mjedisore botërore dhe aktivist i njohur i organizatës Greenpeace.

Gjatë vizitës në stendën shqiptare ai u njoh me veprat e paraqitura dhe u interesua për situatën e sektorit të botimeve në Shqipëri. Në fund të vizitës ai la një mesazh në librin e përshtypjeve, përmes të cilit përshëndeti të gjithë miqtë dhe lexuesit e tij shqiptarë.

Sepulveda do të vijë së shpejti në shqip përmes botimeve të shtëpisë botuese Dudaj, gjithashtu e pranishme në stendën shqiptare, me një numër titujsh të zgjedhur.

Takimet me shkrimtarë

Në hapësirën e stendës u zhvilluan gjatë ditëve të panairit edhe takime me autorë shqiptarë dhe të huaj. Ndër ta spikasin takimi me shkrimtaren Anilda Ibrahimi, vepra e së cilës botohet në Itali nga shtëpia botuese prestigjioze Einaudi dhe ai me gazetarin Alessandro Leogrande, autor i librit “Mbytja e Anijes”, kushtuar ngjarjes tragjike të fundosjes në ujërat e Kanalit të Otrantos, në ’97-ën, të motovedetës “Katër i Radës” pas përplasjes me anijen ushtarake italjane “Sibila”. Takimet ndihmuan në promovimin e stendës dhe u ndoqën me mjaft interes nga publiku i panairit, që u ndal gjatë në bashkëbisedime me autorët e ftuar në mbyllje të veprimtarive.

Konkursi “Lingua Madre”

Një prej momenteve më të ndjekura të Panairit Ndërkombëtar të Librit në Torino ishte edhe ceremonia e dhënies së cmimeve të konkursit të njohur “Lingua Madre”, kushtuar shkrimtareve të reja nga e gjithë bota që shkruajnë në gjuhën italjane. Edhe këtë vit në konkurs merrnin pjesë shumë autore shqiptare, një prej të cilave, 16-vjecarja Lina Alushi fitoi cmimin “Rotary Club Torino Mole Antonelliana” për tregimin më të mirë, që do të botohet në antologjinë e konkursit për vitin 2013.

QËNDRA E KULTURËS SHQIPTARE: Pikë referimi për diasporën dhe institucionet shqiptare dhe italjane

Proçesi i emigracionit drejt vendeve të zhvilluara perëndimore, që ka nisur në fillim të viteve 90-të ka çuar deri më sot drejt Italisë fqinje mbi 500 mijë qytetarë shqiptarë. Rreth një e treta e tyre jetojnë dhe punojnë në rajonet veriperëndimore të Lombardisë dhe Piemontit, që përfaqësojnë së bashku një prej zonave më të zhvilluara të Europës. Pikërisht në këtë territor vepron tashmë prej disa vitesh edhe Qendra e Kulturës Shqiptare. Ajo është themeluar nga një grup intelektualësh, artistësh, sipërmarrësish dhe aktivistësh të shoqërisë civile me qëllim kryesor promovimin e kulturës dhe të imazhit të Shqipërisë.

Qendra mbështet gjithashtu proçesin e integrimit të bashkësisë shqiptare, nxit pjesëmarrjen aktive të qytetarëve shqiptarë në jetën kulturore, sociale, ekonomike dhe politike të Italisë dhe bën përpjekje për zhvillimin dhe konsolidimin e marrdhënieve të bashkëpunimit mes dy vendeve.

Veprimtaria e dendur dhe cilësore ka bërë që Qëndra e Kulturës Shqiptare të jetë sot një prej realiteteve më të njohura e më të spikatura të bashkësisë shqiptare në Itali. Ajo është shndërruar tashmë në një pikë referimi si për qytetarët shqiptarë, ashtu edhe për organizatat dhe institucionet e territoreve ku vepron.

Peshku pa uje

Dërgo me email | Stampo artikullin