10/05/2013 15:53:07

Sabri Godo, i përjetësuar në mermer

Për Kryetarin e Bashkisë, Lulzim Basha, busti do të vlejë si një shtysë drejt marrjes së vendimeve më të mira, në favor të çështjeve për të cilat z. Godo u përpoq, gjatë gjithë karrierës së tij

TIRANE - Imazhi i përjetësuar në mermer i një prej politikanëve më të njohur në Shqipëri, ish deputetit tё Kuvendit të Shqipërisë në dy legjislatura, shkrimtarit dhe skenaristit z. Sabri Godo, u përurua sot në lulishten përpara Parlamentit, ngjitur me shëtitoren “Murat Toptani”, nga Akademia e Shkencave.

Për Kryetarin e Bashkisë, Lulzim Basha, busti do të vlejë si një shtysë drejt marrjes së vendimeve më të mira, në favor të çështjeve për të cilat z. Godo u përpoq, gjatë gjithë karrierës së tij.

“Për mua, sot personalisht, kjo ditë është e ngarkuar me emocion, sikundër për shumë prej nesh por edhe me një sens përmbushje dhe tashmë një pritshmërie të re, një pritshmërie që imazhi i tij i përjetësuar sot në mermer do të vlejë si një shtysë ekstra, përveç kujtimeve tona për të, për të na shtyrë drejt një jete më të drejtë, drejt vendimeve më të mira, në favor të çështjeve për të cilat ai luftoi dhe u përpoq gjithë jetën e tij, familjen, shoqërinë, atdheun dhe kombin” , u shpreh Basha.

Në emër të familjes Godo, vajza e Sabriut, Ermira Godo ka falënderuar Kryetarin e Bashkisë së Tiranës dhe gjithë ata që mundësuan përjetësimin e Sabri Godos në këtë bust.

HermesNews - ©2013

Dërgo me email | Stampo artikullin