26/04/2013 14:31:43

Dance Teater vjen në Tiranë

Shfaqja, nën regjinë e Enton Kacës, është e konceptuar kryesisht tek lëvizja, dance theater dhe forma të tjera tradicionale teatrore

TIRANË - "Skica për dramë, konflikt dhe personazhe" është një performancë e kompanisë teatrore Tirana New Theater, në bashkëpunim me Teatrin Kombëtar, që pritet të ngjitet së shpejti në skenë.

Kjo shfaqje, nën regjinë e Enton Kacës, është e konceptuar kryesisht tek lëvizja, dance theater dhe forma të tjera tradicionale teatrore. Regjisori ka shfrytëzuar tekstet të ndryshme letrare për të realizuar një shfaqje me sa më pak tekst dhe me shumë lëvizje trupore që bazohen tek mendimi.

Kjo shfaqje bazohet në disa tema sociale dhe kryesisht temat e emigracionit, largimit, arratisjes, ikjes, revoltës, refuzimit, vdekjes, braktisjes, ëndrrave, pamundësive, boshit dhe të tjera histori të ngjashme me to. Temat u përzgjodhën nga disa tekste të ndryshme, këngë, poema, ngjarje konkrete, filma, poezi, video, ngjarje historike dhe politike.

Performanca vjen pas një diskutimi me drejtuesit e Teatrit Kombëtar dhe Tirana New Theater, për të konceptuar një shfaqje skenike të një standardi ndryshe nga repertori tradicional i Teatrit Kombëtar, për të krijuar një klimë të favorshme pune me të rinj profesionistë të mediumeve të ndryshme artistike dhe për të krijuar hapësira më të larmishme për audiencën e Teatrit Kombëtar dhe teatrit në përgjithësi në Shqipëri.

Premiera ka nisur punën dhe do të dalë në skenë në datën 2 maj për t’u shfaqur për tre javë rresht në sallën "Kadri Roshi" të TK-së. Koreografia është realizuar nga Elton Cefa & Klaudia Zaçe. Interpretojnë balerinët Milena Nurka, Klaudia Zaçe, Sueda Hoxha, Elton Cefa, Ardit Logu dhe aktorët Egzona Ademi e Dorjan Ramaliu.

HermesNews - ©2013

Dërgo me email | Stampo artikullin