19/04/2013 13:48:11

'Thesaret e trashegimisë kulturore shqiptare' në Kosovë

E organizuar me rastin e 100 vjetorit të pavarësisë nga Ministria e Jashtme dhe ajo e Kulturës e Shqipërisë, e njëjta ekspozitë u paraqit në Romë dhe Torino

TIRANË - Ekspozita "Thesaret e Trashëgimisë Kulturore Shqiptare", me më shumë se 100 objekte të ekspozuara në Itali, do të çelet në fund të muajit edhe në Kosovë.

E organizuar me rastin e 100 vjetorit të pavarësisë nga Ministria e Jashtme dhe ajo e Kulturës e Shqipërisë, ekspozita u paraqit në Romë dhe Torino. Sipas Institutit të Monumenteve të Kulturës, ajo u vizitua nga 97.000 persona dhe një sërë personalitetesh politike italiane.

Objektet e ekspozuara janë disa prej veprave më të njohura e më të rëndësishme të trashëgimisë sonë historike dhe kulturore si “Koka e Apolonit”, e njohur për vite me radhë si "Dea e Butrintit", "Epitafi i Gllavenicës" dhe një përzgjedhje e pikturave ikonografike të mjeshtrit të madh shqiptar, Onufrit. Ekspozita i ofron publikut një udhëtim emocionues në kohë dhe hapësirë, nga epoka parahistorike deri në mesjetën e vonë.

Objektet janë marrë nga Muzeu Arkeologjik i Tiranës si dhe nga muze të tjerë në Apolloni, Durrës, Butrint, Muzeu Historik Kombëtar. Ky projekt ka për qëllim promovimin e kulturës shqiptare përtej kufijve të vendit.

HermesNews - ©2013

Dërgo me email | Stampo artikullin