01/04/2013 11:55:39

NYT, për Alpet Shqiptare

Në seksionin Travel të faqes së kësaj gazete në internet janë rreth dy faqe, të shoqëruara me foto që tregojnë bukuritë natyrore të Shqipërisë

TIRANË - Gazeta “New York Times” i ka kushtuar sërish një shkrim Shqipërisë, kësaj here duke u përqëndruar në kufirin verior me Malin e Zi dhe Kosovën.
Në seksionin Travel të faqes së kësaj gazete në internet janë rreth dy faqe, të shoqëruara me foto që tregojnë bukuritë natyrore të Shqipërisë. “Eskursion përtej kufijve të Ballkanit” është titulli i reportazhit të gazetarit Tim Nevill i cili përshkruan me detaje udhëtimin e tij nga Thethi në Shqipëri, me vështrimin nga Kosova dhe Mali i Zi.

"Udhëtimi të çon në Alpet shqiptare, të quajtura ndryshe në artikull edhe si malet e mallkuara, por që përveç lartësivë të frikshme janë të mbushura edhe me mister", një aventurë e vërtetë, siç përshkruhet në artikull”, thuhet në reportazhin e “New York Times”.

Në artikull nuk mungojnë as intervistat me banorë të zonës, apo pronarë bujtinash deri tek rruga që mund të ndjekë një turist i huaj për të vizituar këto anë. Gjithashtu nuk lihen pa përmendur edhe përshkrime historike. Përmendet viti 1997, ku shqiptarët humbën kursimet e tyre në firmat piramidale, gjë që pasoi me kryengritjet popullore ndaj qeverisë së asaj kohe.

“Nga Lufta e Dytë Botërore deri në vdekjen e udhëheqësit komunist Enver Hoxha në vitin 1985, Shqipëria ishte një shtet i mbyllur hermetikisht. Ai ndaloi fenë dhe uli moshën e ekzekutimeve deri në 11 vjeç, mbylli kufijtë me shtetet e tjera”, shkruhet në fillim të artikullit.

Në reportazh gazetari thotë gjithashtu se turizmi është trefishuar në 6 vite, nga rreth 1 milion turistë të huaj në vitin 2012 ka shkuar në 2,7 milionë turistë të huaj. Tim Nevill e mbyll reportazhin e tij mbi Shqipërinë, duke e cilësuar si një eksperiencë të pakrahasueshmë.

HermesNews - ©2013

Dërgo me email | Stampo artikullin