28/03/2013 10:29:17

Hadrianopolis II vlera arkeologjike te reja

Prezantohen rezultatet e para të gërmimeve dhe studimeve të realizuara në periudhën 2005-2010

GJIROKASTËR - Një punë e tejzgjatur, e konsideruar si mjaft e suksesshme, është ajo e ekspeditave të ndërmarra nga arkeologët italianë të Universitetit të Maceratas, në qytetin romak të Hadrianopolis.

E gjithë kjo gamë eksploruese, me elementë të rrallë në jug të vendit, konkretisht në luginën e Drinos në Gjirokastër, është promovuar në një vëllim të dytë botimi, të mbështetur nga faktorët italianë, sikurse është Universiteti i Maceratas.

Volumi Hadrianopolis II prezanton rezultatet e para të gërmimeve dhe studimeve të realizuara në periudhën 2005-2010, në sitin romak të Hadrianopolis, si dhe një sërë faktesh të reja për Luginën e Drinos, e cila konsiderohet si një nga zonat me prezencë të madhe vlerash arkeologjike dhe historike.

Qyteti antik i Hadrianopolis, ndodhet 14 kilometra larg qytetit të Gjirokastrës. Gjatë studimeve gjeosizmike dhe gjeoradar të misioneve të zhvilluara në periudhën 2006-2007, është arritur të konfirmohet në linja të përgjithshme shtrirja e qytetit 350 metra në drejtim lindje-perëndim dhe 400 metra në drejtim veri-jug me teatrin si pikë referimi, e cila ka një kapacitet prej 4 mijë spektatorësh, është i pajisur me 27 shkallë, ka 4 hyrje dhe një skenë me dy kate.

Objekti datohet rreth 10-vjeçarëve të mesit të shek. II p.k. Për herë të parë ai u evidentua gjatë Luftës së Parë Botërore nga arkeologu austriak Prashniker. Gërmimet e para në këtë objekt u kryen në vitet '80 nga Instituti i Arkeologjisë, nën drejtimin e arkeologut Apollon Baçe.

HermesNews - ©2013

Dërgo me email | Stampo artikullin