12/03/2013 04:04:48

Elbasan, ja aktivitetet që do të mbahen për Ditën e Verës

Janë parashikuar që të ketë një sërë koncertesh dhe aktivitetesh sportive e kulturore në këtë ditë, që nisin me hapjen e panairit Dita e Verës 2013

ELBASAN - Bashkia e qytetit ka hartuar një program të gjërë për Ditën e Verës, festë pagane, që kremtohet çdo fillim pranvere në qytetin e Elbasanit.

Është parashikuar që të ketë një sërë koncertesh dhe aktivitetesh sportive e kulturore në këtë ditë, që do të nisin ditën e nesërme, me hapjen e panairit Dita e Verës 2013.

Sipas kreut të bashkisë, Qazim Sejdini, edhe këtë vit Qendra kulturore e fëmijëve do të organizojë një koncert të madh, i cili do të startojë mesditën e datës 13 mars, e në vijim do të jetë Banda frymore, e cila do të intepretojë në qendër të qytetit muzikë të ndryshme për vizitorët".

Edhe këtë vit ansambli "Isuf Myzuri" do të organizojë një koncert në qendër të qytetit, për të vijuar më pas me këngë të ndryshme të lehta dhe popullore nga këngëtarët e njohur shqiptarë Pirro Çako, motrat Irma dhe Eranda Libohova, Silva Gunëbardhi dhe Mandi, etj.

Shumë pranë mesnatës së Ditës së Verës do të përshëndesë të gjithë qytetarët elbasanas kreu i Bashkisë, Qazim Sejdini, ndërsa më pas fishekzjarret do të mbulojnë qiellin e qytetit.

Festa e Natës së Verës si çdo vit parashikohet të zgjasë që në orët e para të Ditës së Verës, e cila do të nisë me krosin masiv tradicional të shkollave 9-vjeçare të qytetit, parakalimin e karnavaleve përgjatë bulevardit kryesor të qytetit Aqif Pasha.

Parashikohet që edhe këtë vit të marrin pjesë deputetë, pushtetarë, drejtues të lartë të qeverisë.

Dita e Verës është festë e përtëritjes së natyrës e vazhdimësisë së jetës. Festohet më 14 Mars, pikërisht kur mendohet se ka filluar mbirja e bimësisë tradicionale si karakaftet dhe manushaqet.

Rreth origjinës së festimit të Ditës së Verës nuk ka një “version" të qartë, por si festë pagane, Dita e Verës shpreh adhurimin dhe simpatinë për natyrën dhe veprat e saj mbi tokë. Thuhet se zakonet dhe ritet zbatoheshin qysh nga kohët më të lashta. Për ditën në fjalë, ruhej e gjithë zahireja e një moti më parë si arrat, mollët, palët e fikut, ftonjtë, mjalti apo pekmezi.

Në periudhën e socializmit, ndonëse në kohë shumë të vështira, tradita nuk humbi, porse festohej me sa mundësi kish, në të dielën më të afërt me datën 14 mars. Festa pësoi një rigjallërim të dukshëm gjatë mandatit të kryebashkiakut Engjëll Dakli, i cili organizoi në vitet 1998, 1999, 2000, festimet e para masive, duke krijuar kështu rikthimin e traditës për Elbasanin.

HermesNews - ©2013

Dërgo me email | Stampo artikullin