07/03/2013 17:16:50

Tropojë, muzeu hap dyert për vizitorët

Vënia e muzeve dhe pikave turistike në shërbim të zhvillimit turistik të zonës ka bërë që nga viti në vit numri i vizitorëve të vijë në rritje

TROPOJË - Muzeu i rrethit të Tropojës ka hapur dyert për vizitorët, pas rikonstruksionit vitin e kaluar me fondin prej 20 milion lekësh akorduar nga PNUD. Ndërkohë, pas përfundimit të rikonstruksionit, vetëm tani ka nisur puna për pajisjen e tij me materiale muzeale.

“Ka nisur puna për grumbullimin e materialit arkivor e dokumentar nga specialistët. Vemendja është përqëndruar kryesisht në materiale të pikturës vendase, punime të veshjeve tradicionale, punime të drurit etj”, tha Sekretari i Bashkisë, Halil Gjongecaj.

Sipas tij, “edhe pse muzeu ka nisur t’i hapë dyert për vizitorët, ende puna vazhdon për pajisjen e tij me material muzeale”. “Pavarësisht kësaj, pozitive është fakti që tashmë është arritur hapja e tij dhe t’u shërbejë kërkesave gjithnjë në rritje të vizitorëve të huaj që janë gjithnjë të pranishëm në qytetin verilindor”, tha Gjongecaj.

Në rrethin e Tropojës tashmë funksionojnë edhe muzeu i Konferencës së Bujanit dhe kulla e Mic Sokolit. Vënia e muzeve dhe pikave turistike në shërbim të zhvillimit turistik të zonës ka bërë që nga viti në vit numri i vizitorëve të vijë në rritje. Këtij qëllimi i ka shërbyer edhe puna për pajisjen me materiale karakteristike të zonës i muzeve të rajonit.

HermesNews - ©2013

Dërgo me email | Stampo artikullin