07/03/2013 10:25:43

Homazhe në hollin e Teatrit kombëtar në nderim të Roland Trebickës

Topalli, humbëm një kolos të artit shqiptar

(18:28) Kryetarja e Kuvendit, Jozefina Topalli, bëri sot homazhe në ambientet e Teatrit Kombëtar, në nderim të aktorit të mirënjohur Roland Trebicka, i cili u nda nga jeta në mënyrë të parakohshme në moshën 66 vjeçare. Kryetarja Jozefina Topalli shprehu ngushëllimet e sinqerta bashkëshortes, fëmijëve dhe familjarëve të aktorit të shquar Trebicka për humbjen e njeriut të tyre të dashur.

"Të gjithë ne, arti shqiptar, ekrani, humbëm një kolos të komedisë shqiptare", tha Topalli.

(12:13) Presidenti i Republikës Bujar Nishani, përmes një mesazhi ngushëllimi, shprehu hidhërimin e thellë për ndarjen nga jeta të artistit dhe aktorit të shquar Roland Trebicka."Sikur aktori Roland Trebicka të ishte njeri i zakonshëm fjalët e ngushëllimit për ndarjen e tij nga jeta do të ishin më të lehta për t'u zgjedhur e për t'u shprehur.

Është rrugëtimi i mundimshëm drejt artit, është jeta dhe vetë personaliteti i artistit të shquar që na bën të mendohemi shumë e të zgjedhim fjalën më të ngrohtë e të denjë për të shprehur dhimbjen dhe respektin e merituar që ia kemi borxh, sepse ajo çka la pas me artin e tij është një shërbim i madh që i bën vendit", thuhet në mesazhin e ngushëllimit drejtuar familjarëve të aktorit të shquar.

Presidenti Nishani shprehet se "jam i sigurt se familja e tij; bashkëshortja, fëmijët, të afërmit e ndjejnë shumë dhimbjen, por po aq jam i bindur se kjo dhimbje përkthehet në respekt dhe mirënjohje të madhe nga çdo shqiptar që ka pasur dhe do të ketë fatin të ndjekë Rolandin në rolet e tij të mrekullueshme".

"Jeta e tij e shkurtër është pragu i fillimit të një pavdekësie, të cilin ai e ka merituar dhe ne jemi krenarë për kontributin e tij ndaj artit dhe kulturës shqiptare", përfundon mesazhi i ngushëllimit i Presidentit Nishani.


TIRANË - Aktori i mirënjohur shqiptar, Roland Trebicka, ndërroi jetë në moshën 66 vjeçare, pas një sëmundje të rëndë. Sipas familjarëve, Trebicka ndërroi jetë sot pasdite rreth orës 17.00. Homazhet në nderim të aktorit të mirënjohur do të zhvillohen nesër në orën 11.00 në hollin e Teatrit Kombëtar. Ndërkohë, ceremonia e varrimit do të zhvillohet në orën 13.00. Roland Trebicka lindi në Korçë në vitin 1947, ndërsa roli i tij i parë si aktor është ai i Kostës, në filmin "Debatik", më 1961. I njohur për sensin e tij të humorit, Trebicka do të mbahet mend gjatë për rolin në komedine "Pallati 176", atë të Jovan Bregut. Rolet e Trebickës në teatër janë të shumta, ndërsa njihet edhe për rolet e tij në në disa filma.

HermesNews - ©2013

Dërgo me email | Stampo artikullin