05/03/2013 17:27:34

Artisti Bajram Maro rikthehet me një ekspozitë pikture në Fier

Në realizimet e Matos ndihej nostalgjia për qytetin, hallet dhe brengat e emigracionit, natyra e bukur e vëndlindjes

FIER - Piktori fierak, Bajram Mato, çeli sot në Galerinë e Arteve të qytetit të Fierit ekspozitën personale me 87 punime në pikturë. Pas një periudhe gati 22 vjeçare në emigracion, Itali, Mato rikthehet në qytetin e tij, duke folur dhe përshëndetur me gjuhën e artit.

Artistët e shumtë, miq dhe koleg të piktorit, por edhe publiku i shumtë artdashës që kishte mbushur ambientet e galerisë, vlerësoi maksimalisht pikturat, jo vetëm për realizimin mjeshtëror, për imazhin artistik, koloritin e pasur dhe plot dritë, por edhe për tematikën e gjerë dhe mesazhet që përcillnin.

Në realizimet e Matos ndihej nostalgjia për qytetin, hallet dhe brengat e emigracionit, natyra e bukur e vëndlindjes. Më shumë se fantazi, ato ishin realizim artistik i bukurive natyrore dhe vlerave njerëzore.

"Punimet e mia janë realiste, të zgjedhura në momente të ndryshme të natyrës dhe, që kanë marrë kontakt me natyrën, të realizuara me teknikën e punimit në vaj", tha Mato.

Mato pohon se i pëlqen rryma realiste, e interpretuar me frymë impresioniste. Sipas tij, jeta në emigracion nuk e pengoi nga pasioni për pikturën, përkundrazi e ndezi edhe më tepër. Për këtë, ai falenderon miq e kolegë, por edhe artistë italianë që me ndihmën dhe ngrohtësinë e tyre ia ushqyen pasionin.

"Emigracioni ka ato problemet e njohura ekonomike. Por kolegët që kam njohur në Itali më kanë mbajtur afër dhe kjo ka qënë një mënyrë frymëzimi për të mos e shuar pasionin”, tregon ai.

Mato ka lindur në qytetin e Fierit në vitin 1956. Në vitin 1974 ka mbaruar liceun artistik dhe deri në vitin 1991, kohë kur u largua në emigracion ka qënë anëtar i Lidhjes së Artistëve dhe Shkrimtarëve të Fierit.

Ka marrë pjesë në të gjitha ekspozitat lokale e kombëtare të organizuara në ato vite si dhe ka realizuar disa ekspozita personale. Në këto 21 vite kjo është ekspozita e parë në Shqipëri, pasi në Itali ka realizuar disa ekspozita personale dhe ekspozita të përbashkëta.

HermesNews - ©2013

Dërgo me email | Stampo artikullin