04/02/2013 17:42:22

Amadeus, rikthehet në Teatrin Kombëtar

Shfaqja do t’i ngjajë pikërisht atij vajtimi të munguar për Mjeshtrin

TIRANË - Ndërkohë që në Teatrin Kombëtar premierat e reja të sezonit janë ende në fazën e provave, edhe këtë fundjavë publikut do t'i ofrohet një shfaqje e repertorit.

“Amadeus” me regji të Altin Bashës, rikthehet në skenën e TK-së, në 9 dhe 10 shkurt. Drama e Peter Shapffer rrëfen historinë e luftës mes Salierit dhe Amadeusit për të zënë vendin e dirigjimit në orkestrën e oborrit të mbretit Jozef i Dytë.

Shfaqja do t’i ngjajë pikërisht atij vajtimi të munguar për Mjeshtrin. Hijet fantomatike që kaluan në rresht para shtëpisë së tij, do jenë figurat dhe personazhet e shfaqjes. “Amadeus” është një ftesë për një udhëtim në universin e gjeniut të pavlerësuar. Si në një ëndër,r publiku do të futet në universin Moxartian për të ridimensionuar fuqinë e talentit.

Duke parë talentin e Amadeusit, Salieri që ishte dhe dirigjent në oborrin mbretëror, thur një komplot. Ai vishet me një maskë, që nuk njihet dhe i kërkon Amadeusit të shkruajë dy vepra kishtare. Salieri e merr veprën e Amadeusit dhe e interpreton në oborrin mbretëror, duke treguar se ai ishte kompozitori i pjesëve të muzikës kishtare, duke marrë në këtë mënyrë edhe famën e veprave muzikore.

Në rolet kryesore interpretojnë aktorët si, Fatos Sela, Marin Orhanasi, Eni Jani, Romir Zalla, Gazment Paja, Gjergj Mena, Ahmet Pasha, Vangjel Toçe, Mërkur Bozgo, etj. Javën që shkoi në skenën e TK-së u ringjit “Ëndrra e Ismail Qemalit” e Spiro Dunit, ndërkohë dy premirat e reja do të jenë “Edipi Mbret” me regji të Ilir Bokshit dhe “Ëndrra e një nate vera” me regji të John Blondell.

HermesNews - ©2013

Dërgo me email | Stampo artikullin