19/01/2013 15:21:12

Kek me dy ngjyra

nga Brunhilda Cela

Sekretet e aromave të Brunhildës Receta e kekut me dy ngjyra
Për të dy kekë:
7 vezë
pak kripë
400 g sheqer
260 g miell
200 ml vaj
1/2 qese pluhur pjekje (5 g)
1-2 lugë gjelle kakao pluhur për gjysmen e kekut pasi e ndajmë në dy pjesë.

Për kremin na nevojiten këto përbërës:
1 pako puding vaniljeje
300 ml qumësht
200 g sheqer
200 g gjalpë

Për glasurën lart na duhen:
200 g çokollatë guzhine e errët
150 ml krem pana
50 g gjalpë
Për dekorin:
50 g çokollatë të bardhë

Përgatitja: Ndajme te bardhat e vezeve nga të verdhat. I rrahim të bardhat me pak kripë sa të bëhen shkumë dhe po ta marrim me një lugë e ta përmbysim shkuma nuk bie poshtë. Të verdhat i rrahim me sheqer rreth 8 minuta, aty shtojmë vajin vazhdojmë përzierjen, shtojmë edhe miellin e situr më parë të cilin e përziejmë me pluhurin pjekës. I rrahim me mikser duke ngadalësuar shpejtësinë e mikserit.

Në fund shtojmë të bardhat e vezëve të rrahura duke i përzier me kujdes në mënyrë vertikale. Kekun mund ta aromatizoni sipas shijes edhe me pak lëkurë limoni,apo portokalli ose esencë vaniljeje. E ndajmë në dy pjesë të barabarta dhe tek njëra pjesë shtojme kakaon dhe e përziejmë mirë.
I pjekim në dy forma drejtkëndëshe të barabarta në furrë të parangrohur në temp. 200 gradë rreth 20-25 min.

Kjo varet edhe prej sobës suaj, shikojeni vetë duke bërë provën me një shtizë. E ç'poni me shtizë dhe nëse është e lagësht keku nuk është i pjekur mirë.Nëse shtiza del e pastër atëherë pjekja ka përfunduar. Ndërkohë që kekun e kemi vënë të piqet ne merremi me kremin të cilin e përgatisim në këtë mënyrë:

Në një tenxhere vëmë qumështin që është dhënë në recetë (300 ml) të nxehet dhe tresim pudingun e vaniljes me një filxhan qumësht tjeter ë ftohtë ose edhe ujë dhe ia hedhim në fund pasi qumështi është nxehur.Gjithmonë duke e përzier me telin e guzhinës që mos të na bëhet kokrra. E lemë të ftohet duke i vënë sipër një folie plastike që mos të bëhet me kore lart.

Në një enë tjetër rrahim sheqerin me gjalpin derisa masa te zbardhet dhe sheqeri të tretet pothuaj fare. Pastaj i bashkojmë të dyja masat bashkë pra gjalpin e rrahur me budingun e ftohtë.Kështu kemi përfituar një krem homogjen i cili na nevojitet per ngjitjen e copave të kekut. Kekun e pjekur e presim në feta të trasha rreth 1 gisht e gjysëm deri në dy gisht.

I radhisim në një formë katrore në ketë mënyrë: fillojmë me copën e errët,e lyejmë me krem dhe shtojmë atë pa kakao e kështu me radhe një po një jo pra një e errët një e verdhë dhe gjithmonë me krem midis bëhet ngjitja.
Në fund tresim të dyja cokollatat në banjë mari edhe ate te errëtën edhe të bardhën që do përdorim për dekor. I hedhim glasurën prej cokollate të errët sipër kekut të shtruar dhe pastaj e dekorojmë me ca vija prej cokollate të bardhë të tretur.

Pastaj që të kemi efektin e bukur të vijave në brendësi të kekut do bëjmë prerjen pjerrëtas,pra presim copën e parë pjerrëtas e kështu me radhë edhe copat e tjera. Ju bëftë mirë !

HermesNews - ©2013

Dërgo me email | Stampo artikullin